|
كتير حلو هالكلام و كتير حلو الواحد يذكر الايجابيات
بس معليش حابب شارك بشوية امور لاحظتها بالحقيقة و ليس على الورق و التقارير و سبب هالمشاركة هو انو نلاقي حل و ليس من باب النقض و انو بس صفيت حكي
انا بشتغل بشركة استثمارية و في عنا وكالة تعليمية بدنا نفتح الها فروع بالشرق الاوسط ....... طبعا من بين الدول يلي اقترحتها كانت سوريا و كان الجواب الرفض
طيب بنشتغل كمان في مجال الاجهزة الطبية و تجهيزات المشافي
و بنشتغل في مجال المياه و تجهيزات مصانع المياه
بمجال التعليم رفضت شركتنا الاستثمار بسوريا بحجة ضعف الموقف المالي لغالبية المدارس ....... يعني انو مارح نلاقي مدارس بتشتري برامج و بتدفع عليها سنويا مشان يتعلمو طلابها ..... لانو اولياء امور الطلاب بالتالي غير قادرين على تحمل تكلفة هيك برامج
تجهيزات المشافي كمان تم رفض طلب الاستثمار بسوريا بحجة انو اساسا المشافي الخاصة عنا قليلة و كمان ما عنا قانون بيفرض تجديد الاجهزة المستخدمة متل باقي البلاد و المشافي العامة فالعوض بسلامتك
في مجال المياه لما رفضت الشركة الاستثمار في هاد المجال ........ حاولت مع مستثمر تاني و لكن بعد لفة و دورة كان الرد كالتالي انو في قرار و لكن لسا ما تطبق و انتظر الفرج مع العلم اننا بنستورد المياه من دول نحن بنعطيهن مياه جارية......... و هاد الحكي قبل سنة
رحنا على السودان و خلال اسبوع فقط قررنا انو نستثمر في مجال التعليم (ليس البرامج لانو كمان السودانين ما معهن يمشو) و شاركنا في مصنع لانتاج العصيرات و المربيات للتصدير و اخدنا ارض بالشراكة مع شركة امارتية لبناء مركز اعمال .......... لانو الحكومة السودانية عطتنا الاراضي بخصم ستين بالمية من القيمة و تسديد قيمتها على مدى عشر سنوات اعفاء من الضرائب لمدة ثلاث سنوات اعفاء من الرسوم الجمركية لاي مستوردات بهدف استخدامها لاغراض الاستثمار
شركتنا عندها استثمارات باللبنان ........... طيب ليش مع انو سوريا اكثر امنا و استقرارا من اللبنان
لانو القوة الشرائية للمواطن السوري ضعيفة بسبب ضعف الدخل اولا
و لانو قوانين الاستثمار لساتها صعبة مقارنة مع الغير على فكرة المستثمر متل النحلة ما بيعطي قبل ما يشبع و هون المشكلة انو بدنا الناس تخاطر بفلوسها و ما بدنا اياهن يربحو او يستردو اموالهن بوقت مناسب لحجم الاستثمار
و لانو في تخوف من النظام السوري بشكل عام و الفكرة المأخودة عن سيطرة البعض على نواحي الاقتصاد بسوريا ( يعني بالاخير لحكالي صاحب الشركة انو بالتمانينات مسترد دين الو على واحد بانو اخد بالمقابل منو بيت بالشام و لما بعت واحد ليشوف المسـتأجر و انو شو وضعو رادد عليه الحبيب انو اذا بشفوك مرة تانية بقوصك ...... لحد ما الزلمة اضطر يدفع لياخد حقو) و هون انا فهمت ليش و من وين اخد فكرتو
المحسوبية و البيرقراطية بالمعاملات موصلة للعضم و ناخرتو نخر ....... يعني على مستوى فندق متل الفورسيزنز لما بلش يستقبل طلبات للتوظيف سبعين بالمية من العالم توظفت بالواسطة ( طيب انا كمستثمر ما بدي حدا بنفرض عليي و لو مين ما كان
على فكرة و على عكس الفكرة المأخودة نحن ما عنا الخبرات المؤهلة لادارة المشاريع الحديثة و الاستثمارية و اذاعنا خبرات فغالبيتها مغتربة و يلي موجود صوصتو مالو واصل بالاغلب الا من رحم ربي و هاد كمان بدو واسطة
و كمثال و متل ما فهمت انك على علاقة بمجال العمل المصرفي و معناها انك بتعرفي شو صار لما بلشت البنوك تفتح و مالو الخبرات الكافية لتشغيلها و اضطرينا للاعتماد على الخبرات الاجنبية و خصوصا المجاورة ....... طيب انا كدولة و ناوية بدي اعمل بنوك ما بفكر و قبل كم سنة اني اعمل اختصاص بانكنغ بالجامعات ؟
هلأ الوضع اتغير اكيد .......... و لكن الناس بدها فترة لبينما تنسى الفكرة القديمة
و كمان المستثمر بيهمو انو يضمن انو فلوسو بتطلع من البلد يلي فاتت عليها
لاحظي المغتربين السوريين و مدى مشاركتهم بالاستثمار في سوريا (صحيح في منهم اجا و استثمر و لكن كنسبة و تناسب رح تلاقي النسبة ضعيفة كتير) و كمان برجع بقول انو بسبب الفكرة القديمة
ما رح نفوت بالاسباب السياسية و على الاخص الخارجية منها و مدى تأثيرها على بيئة الاستثمار و انا من الناس المعجبين بقدرتنا على اعادة قيمة الليرة السورية خلال مشكلة الحريري و كانت بمجهود فدي سوري و من دون مساعدة و انما تحت ضغط بعض الدول الشقيقة
انشالله متفائلين بالخير و لكن بدها صبررررررررررررررر كتير لانو عنا الوضع ابطئ من السلحفة نفسها و بلشنا بعد ما العالم وصلت
و بشكل عام يعطيكي العافية و لكن التقارير مع صحتها بقول انها بتعطي فكرة عامة و لكن على الواقع الوضع بيختلف و لسا البلد بدها تنظيف بالكلور من كتير عالم و الله يقويهن و يصبرنا
ملاحظة صغيرة اذا لقيتي انو المشاركة مالها داعي بموضوعك فانا على استعداد على مسحها و بكل صدر رحب
تحياتي
.
|